هو ينفع تشتري عربية من غير ما تعرف نوعها وتقارنه مع باقي العربيات عشان تتأكد إن دا أفضل نوع مناسب ليك ؟ طبعا لأ ..

ونفس الكلام في حمامات السباحة ..لازم تعرف أنواعها كويس جدا ومميزات وعيوب كل نوع وتحدد إيه المناسب ليك من حيث طبيعة المكان والمساحة والتكلفة وحاجات تانية كتير.

عشان كده لازم تعرف إن حمامات السباحة في العالم كله هم نوعين إتنين ملهمش تالت وهما “إسكيمر وأوفرفلو”.

وإن في 8 إختلافات رئيسية بينهم وأكيد هتفرق في قرارك في الإختيار:

1. من حيث الشكل :

   منسوب المياه في الإسكيمر بيكون أقل من منسوب التشطيب بحوالي 15 سم لكن في الأوفرفلو بيكون منسوب المياه غالبا هو منسوب التشطيب حول حمام السباحة.

2. معنى إسم كل منهما “

   الإسكيمر هو جزء أبيض بلاستيك يوجد بداخل أعلى حائط حمام السباحة وتدخل منه المياه وهو المسئول الأول عن الفلترة وتدخل المياه فيه لتصل الى الفلتر والطلمبات ثم تعود لحمام السباحة من مداخل المياه.

   والأوفر فلو معناه “السريان الزائد” يعني كمية المياه التي تفيض من حمام السباحة بإستمرار وتسقط في مجرى الأوفرفلو ثم تذهب إلى خزان الموازنة ثم تعود لحمام السباحة وتستمر هذه العملية ليستمر حدوث الأوفرفلو.

3. إتجاه حركة المياه :

   في الإسكيمر عادة بتكون مداخل المياه في الحائط وبتدفع المياه للوصول للإسكيمر في الحائط المقابل ليها وبالتالي حركة المياه غالبا تكون أفقية وتكون حركة المياه ملحوظة مثل الموجة.

   في الأوفرفلو عادة بتكون مداخل المياه في الأرض وتصعد المياه لأعلى لتسقط من حائط الحمام في مجرى الأوفرفلو المحيطة به ولهذا السبب تكون حركة المياه ناعمة جدا وتشعر أن سطح المياه مستقر جدا كأنه لا يتحرك.

4. مكونات جسم حمام السباحة:

   الاسكيمر بيتكون من جسم الحمام وغرفة الطلمبات فقط.

   لكن الأوفرفلو بيتكون من جسم الحمام وغرفة الطلمبات لكن يزيد عليهم مجرى الأوفرفلو حول حمام السباحة ثم خزان الموازنة ويكون بجوار غرفة الطلمبات.

5. التكلفة :

   نتيجة للسبب السابق ولزيادة مكونات وحجم حمام السباحة الأوفرفلو عن الإسكيمر يعتبر الأوفرفلو أغلى من الإسكيمر في حال كانت المقارنة بين نفس مقاس حمام السباحة في الحالتين.

6. جودة الفلترة:

   يعتبر الأوفرفلو أعلى من الإسكيمر في جودة فلترة المياه لسبب ان محيط المياه بالكامل عادة يسقط في مجرى الأوفرفلو ودائما الشوائب والأتربة تكون موجودة في مسطح المياه وطالما تسقط سريعا في مجرى الأوفرفلو بالتالي ستظل مياه الحمام نظيفة أكبر قدر ممكن من الوقت.

7. معدل إستهلاك كيماويات النظافة:

   كلما زادت جودة الفلترة تقل الشوائب ولذلك يعتبر الأوفرفلو هو الأقل في معدل استهلاك الكيماويات اللازمة لقتل الشوائب والبكتيريا نظرا لزيادة معدل الفلترة فيه عن الإسكيمر.

8. المكان المناسب لكل منهما:

   الإسكيمر مناسب جدا للأماكن الضيقة والأماكن المغلقة لإن حينها يقل معدل التلوث وبالتالي لن يكون للأوفرفلو أفضلية كبيرة تذكر على عكس لو كان الحمامين في مكان مفتوح يكون الأوفرفلو هو الأفضل .

ولو عايز تعرف تفاصيل أكتر مدعومة بالصور والفيديوهات فأنصحك بمشاهدة الفيديو الأكثر مشاهدة عن أنواع حمامات السباحة ونال إعجاب آلاف المتابعين والمهتمين بحمامات السباحة.

أتمنى لك مشاهدة مفيدة وممتعة ومنتظر أجاوبك أي سؤال أو إستفسار .

كتبه م/ مصطفى أبو الفتوح

رئيس مجلس إدارة شركة ريفربوول لحمامات السباحة واللاندسكيب